Inicio / Noticias / Notas de prensa / Galicia Calidade colabora co Club gallego de automóviles antiguos na súa peregrinación dende Jaca a Compostela
16/07/2010.

Galicia Calidade colabora co Club gallego de automóviles antiguos na súa peregrinación dende Jaca a Compostela

A expedición chegará mañá sábado a Santiago e o domingo pola mañá haberá unha exposición dos vehículos na praza do Obradoiro

A consellería de Economía e Industria, a través de Galicia Calidade, colabora coa expedición que o Club Gallego de Automóviles Antiguos levará a cabo dende Jaca a Santiago. O vindeiro sábado os vehículos clásicos chegarán a Compostela para permancer expostos na Praza do Obradoiro o domingo pola mañá durante a visita dos pilotos e acompañantes á Catedral.

Galicia Calidade promocionará así a marca de garantía a través de automóbiles con gran valor histórico e que no caso de seren galegos merecerían o selo de garantía pola súa diferenciación e pola calidade, que se demostra coa antigüidade coa que contan. Os turismos contarán cun adhesivo nos cristais co logotipo da marca de garantía e que os identificará durante o seu periplo.

Nesta viaxe serán un total de 30 vehículos os que realicen o percorido dende Jaca e que comezou o pasado domingo 11 de xullo e no que viaxan máis de 60 persoas. Entre os obxectivos desta peregrinación atópanse a difusión de Galicia como fin turístico e cultural, a sensibilización sobre a defensa, fomento e conservación do legado histórico-cultural que supón o automóbil e aumentar o coñecemento e entusiasmo polo mundo do automóbil.

Entre o parque móbil que se desprazará dende Jaca a Compostela hai coches que contan con 80 anos de antigüidade, vehículos que contan con todos os mecanismos técnicos en perfecto estado pois a distancia e as etapas de douscentos kilómetros diarios fai desta proba unha esixencia para os motores. Chvrolet, Ford, Austin, Hudson, Packard, Citroen, Plymouth, Rolls Royce son algúnhas das marcas dos turismos en cuestión.

Redes sociales

Multimedia