Inicio / Certificacións de orixe

Arzúa-Ulloa

O queixo amparado pola Denominación de Orixe Protexida Arzúa-Ulloa elabórase con leite de vaca, natural e enteiro, cru ou pasteurizado, procedente das razas rubia galega, frisona, pardo-alpina e dos seus cruzamentos.

Os queixos preséntanse en pezas de 0,5 a 3,5 kg. A zona de produción, tanto do leite como dos queixos, abrangue os concellos das comarcas de Arzúa, Melide, A Ulloa e Chantada, ademais doutros limítrofes, polo que a área delimitada se sitúa no corazón de Galicia.

Características

A DOP Arzúa-Ulloa ampara os seguintes tipos de queixos:

  • Arzúa–Ulloa: É un queixo de pasta branda, elaborado con leite cru ou pasteurizado, cunha maduración mínima de seis días, de forma lenticular ou cilíndrica e cos bordos redondeados. A súa codia, fina e elástica, é dun ton amarelo entre medio e escuro, brillante, limpa e lisa. A pasta é de cor uniforme, entre branca marfil e amarela pálida, de aspecto brillante, sen gretas e con poucos ollos, que adoitan ser pequenos, angulosos ou redondeados e de distribución irregular. O seu diámetro estará comprendido entre 120 e 260 mm e a súa altura entre 50 e 120 mm, pero esta última nunca poderá superar a do radio.
  • Arzúa-Ulloa de Granxa: Elaborado con leite cru ou pasteurizado, coa particularidade de que este procede na súa totalidade de vacas da propia explotación. As características sensoriais destes queixos son o aroma a leite fresco e a iogur, que deixa paso a un aroma a manteiga conforme van madurando, xunto con matices de vainilla, nata e noces. O sabor é lixeiramente salgado, cun característico punto de acedume.
  • Arzúa-Ulloa Curado: Está elaborado con leite de vaca, cru ou pasteurizado, e ten un período de maduración mínimo de seis meses. A súa forma tamén é lenticular ou cilíndrica e a cara horizontal superior pode ser lixeiramente cóncava. Presenta unha codia non diferenciada de cor amarela moi intensa, brillante e de aspecto graxo. O seu peso oscila entre 0,5 e 2,0 kg. O seu diámetro está comprendido entre 120 e 200 mm e a súa altura entre 30 e 100 mm. O queixo Arzúa-Ulloa Curado caracterízase pola súa dureza, o que fai que sexa difícil de cortar, e pódese fracturar en lascas, principalmente nos bordos. O seu aroma é moi intenso, de tipo lácteo moi evolucionado, cunha sensación olorosa penetrante e con certo picante. O seu sabor é algo máis salgado, con menor acedume e aromas predominantemente a manteiga con lixeiras notas de vainilla e froitos secos.
Datos técnicos (2014)
  • Gandeiros: 1.222
  • Queixerías: 21
  • Produción: 3.209 toneladas
  • Valor económico estimado: 19,4 millóns de euros

Redes sociais

Multimedia