Inicio / Certificacións de orixe

Lacón gallego

A Indicación Xeográfica Protexida Lacón Gallego protexe as extremidades dianteiras do gando porcino, tradicionalmente designadas con este nome, despois de seren curadas.

Os lacóns protexibles proceden de porcos das razas celta, large whitelandrace, duroc e dos seus cruzamentos. Tamén se aceptan os cruzamentos coas razasbranca belgae pietrain, sempre que interveñan nunha proporción inferior ao 25%.

Os porcos para sacrificio deben ter como mínimo seis meses de idade e 90 quilos de peso vivo.Despois de os sacrificar, o despezamento realizarase segundo a tradición e a norma do corte redondo. A elaboración realízase en varias fases: salgadura, lavadura, asentamento e secado ou curación, cunha duración mínima de 30 días. Non se admite a afumadura.

As pezas de Lacón Gallego teñen un peso que oscila entre 3 e 5,5 quilos e tanto a zona de produción como a de elaboración comprenden toda a comunidade galega. Ademais, deben reunir as seguintes características:

  • O lacón estará enteiro e conservará a pel e o pezuño, pero non os cascos.
  • A forma exterior será redondeada e perfilada nos bordos ata a aparición do músculo.
  • A textura debe ser firme ao tacto, sempre en relación co seu grao de curación.
  • A graxa presentarase untuosa, abrancazada ou lixeiramente amarela, brillante, aromática e de sabor agradable.
  • A masa muscular será de cor rosa ou avermellada e presentará resistencia media ao corte e graxa parcialmente infiltrada nela.
  • O aroma será suave, agradable, exento de rancio e de olores estraños e o sabor pouco salgado, de impresión suave, untuoso e con certa intensidade.
Datos técnicos (2014)
  • Explotacións: 191
  • Industrias: 12
  • Produción: 8.247 quilos
  • Valor económico: 56.080 euros

Redes sociais

Multimedia