Inicio / NOVAS / Notas de prensa / A Xunta presenta o stand de Galicia coa enogastronomía como eixe central e con récord de presentacións no espazo galego en Fitur
13/01/2023.

A Xunta presenta o stand de Galicia coa enogastronomía como eixe central e con récord de presentacións no espazo galego en Fitur

A directora de Turismo de Galicia, Nava Castro, explicou que o stand de Galicia acollerá arredor de 54 presentacións de recursos, produtos e novidades, entre as que se atopan presentacións de concellos, deputacións, xeodestinos, presentacións gastronómicas, e presentacións deportivas, entre moitas outras

A directora de Turismo de Galicia, Nava Castro indicou que Galicia mostrará o mellor do seu territorio ben a través do Camiño de Santiago, ben a través da gastronomía, dos recunchos, das augas termais, do ecoturismo, da natureza, das festas de interese turístico nacional e internacional.Tamén a través das rías, os náuticos, as praias, as súas augas tanto no mar como nos seus ríos. En definitiva, mostrará que Galicia é un referente en turismo sostible e de calidade.

O stand de Galicia acollerá arredor de 54 presentacións de recursos, produtos e novidades, entre as que se atopan presentacións de concellos, deputacións, xeodestinos, presentacións gastronómicas, e presentacións deportivas, entre moitas outras. O stand ten maís de 1.000 metros cadrados e está situado no pavillón 9 do Ifema. O Goberno galego mantén o mesmo stand do pasado ano nun espazo que combina creatividade e sostibilidade, co obxecto de optimizar o gasto.

O stand está concebido co modelo circular das 4 R, (Reducir, Reutilizar, Reciclar e Recuperar), que forman parte das novas oportunidades que nos ofrece o turismo en Galicia. Concíbese como un conxunto escenográfico que transmite a Galicia como destino turístico sostible e de calidade, sendo un punto de encontro e de referencia para o sector turístico galego.

“A enogastronomía galega, baseada na calidade da materia prima do produto local e da súa cociña, forma parte do patrimonio de Galicia, da súa identidade e do seu estilo de vida, polo que resulta un recurso para situar á nosa Comunidade como un destino enogastronómico de primeiro nivel no mapa da excelencia. A enogastronomía é unha das primeiras preferencias dos viaxeiros que deciden visitar Galicia, e, por tanto, un dos recursos claves do modelo turístico galego”, indicou Nava Castro.

Redes sociais

Multimedia