Inicio / NOVAS / Notas de prensa / Conde aposta por unha industria galega do viño que combine calidade con tradición e innovación para seguir crecendo
29/05/2017.

Conde aposta por unha industria galega do viño que combine calidade con tradición e innovación para seguir crecendo

Entregou o selo Galicia Calidade a Terra de Asorei, unha adega que constitúe un exemplo de aposta pola modernización das súas novas instalacións e o seu impulso pola Adega 4.0

O conselleiro de Economía, Emprego e Industria, Francisco Conde, destacou durante a súa visita á adega Terra de Asorei, en Meis (Pontevedra) a aposta da Xunta por unha industria galega do viño que combine calidade con tradición e innovación para seguir crecendo. É o caso de Terra de Asorei que recibiu oficialmente o selo de Galicia Calidade e conta coas técnicas máis avanzadas de tratamento e elaboración.

O titular de Economía definiu o proxecto como "moderno e diferenciado" no Salnés que se está situando nunha comarca que destaca polos seus caldos, xa que desenvolve na súa xestión as claves para o éxito no mercado que, segundo Conde, son o coñecemento, a innovación, o produto de calidade e o entusiasmo e paixón.

De feito, nas súas novas instalacións, o titular de Economía explicou que mesturan o coñecemento empresarial e adegueiro coas últimas innovacións en tecnoloxía e equipamento. A aposta pola modernización, un feito no que incide o Goberno galego para que a industria galega siga crecendo e exportando, permítelle na actualidade á adega do val do Salnés unha capacidade para producir 400.000 botellas ao ano. 

A empresa, que naceu hai máis de 70 anos, produce na actualidade nas súas 60 hectáreas de viñedo tres marcas da D.Ou Rías Baixas e exporta a unha decena de países, onde factura hoxe en día o 35% das súas vendas. A compañía non só está presente en países europeos como Reino Unido ou Holanda, senón tamén en Estados Unidos e Xapón.

Adega 4.0

Conde puxo en valor que, nesta aposta pola modernización, resalta o seu impulso pola Adega 4.0, que está en concordancia co modelo de futuro polo que avoga a Xunta para o tecido empresarial en Galicia: a Industria 4.0. Para iso, Terra de Asorei centra os seus investimentos en mellorar a produción, o que repercute nun control máis exhaustivo da calidade da uva durante todo o proceso, desde a cepa ata a súa elaboración e posterior comercialización.

Así mesmo, afirmou que esta aposta tradúcese en novas oportunidades de negocio colaborando co Clúster da Alimentación para participar en proxectos que incrementen a súa presenza no comercio dixital e, deste xeito, mellorar as súas vendas online.

Ademais, Conde resaltou que baixo o selo Galicia Calidade a adega segue crecendo fóra das fronteiras galegas cun certificado que, na actualidade, teñen 96 firmas e máis de 350 produtos, das que 14 son adegas das cinco denominacións de orixe: sete de Rías Baixas, dúas de Monterrei, dúas de Valdeorras, un do Ribeiro e dous da Ribeira Sacra. De feito, o ámbito agroalimentario (viños, bebidas, lácteos e alimentación en xeral) ten un papel destacado, representando a metade das empresas.

Galicia Calidade, tal e como explicou o conselleiro, quere acompañar a todas aquelas adegas que, como Adega Terra de Asorei, están a traballar pola mellora constante dun viño. Segundo dixo, é a fórmula para competir nos mercados internacionais máis esixentes e satisfacer as demandas do consumidor. "Galicia Calidade está ao servizo das empresas para axudarlles nos procesos de internacionalización, sempre vinculados ao territorio e a tradición?, engadiu.

Para finalizar, incidiu na posta en valor do sector vitivinícola que, segundo apuntou, enriquece o valor turístico de Galicia e a calidade que exporta a economía galega. 

Redes sociais

Multimedia