Inicio / NOVAS / Notas de prensa / A CONSELLERÍA DE ECONOMÍA E INDUSTRIA ESTARÁ PRESENTE NO SALÓN GALEGO DE GASTRONOMÍA E TURISMO, XANTAR, DO 6 AO 10 DE MARZO
25/02/2013.

A CONSELLERÍA DE ECONOMÍA E INDUSTRIA ESTARÁ PRESENTE NO SALÓN GALEGO DE GASTRONOMÍA E TURISMO, XANTAR, DO 6 AO 10 DE MARZO

O evento, que cumpre a súa decimocuarta edición, terá lugar no pazo de congresos Expourense

A Consellería de Economía e Industria, a través de Galicia Calidade, estará presente do vindeiro 6 ao 10 de marzo no Salón Galego da Gastronomía e Turismo, Xantar, que terá lugar no pazo de congresos Expourense. A marca de garantía contará cun stand onde promocionará os produtos e servizos amparados polo selo autonómico á marxe doutras actividades como catas e degustacións.

O programa de actividades do salón inclúe un showcooking e varias catas comentadas de distintos produtos. Contará ademais cun stand no corredor central de Xantar que presentará ós visitantes os alimentos desta marca. Galicia Calidade ratifica o seu apoio a esta cita converténdose de novo en patrocinador.

O showcooking de Galicia Calidade terá lugar o sábado 9 de marzo ás 12.00 h.. Consistirá na elaboración de receitas creativas con produtos adscritos a este selo de garantía e correrá a cargo da chef Marian Rodríguez, a cociñeira elixida para poñer en marcha a campaña “Experiencias Galicia Calidade” que a levou a impartir clases por toda Galicia.

Catas comentadas

Durante os cinco días de duración do salón impartiranse ademais catas comentadas de alimentos de marcas con este selo (viños, queixos e augas) e que estarán impartidos por representantes da Asociación Galega de Sumilleres-Gallaecia. A marca estará presente en varios puntos do salón grazas a varios soportes promocionais de gran formato que recordarán ós miles de visitantes a Xantar, moitos deles de fóra de Galicia, a calidade da gastronomía galega.

Con esta iniciativa, Galicia Calidade quere mostrar aos consumidores o valor engadido que supón para un produto ou servizo galego contar con este distintivo, acreditando a súa calidade superior aos seus competidores, e apostando pola súa orixe galega na internacionalización dos seus mercados.

Na actualidade Galicia Calidade conta con 46 empresas e máis de 250 produtos e servizos amparados. Poden consultar máis información na web www.galiciacalidade.es

Redes sociais

Multimedia