Inicio / NOVAS / Notas de prensa / Galicia Calidade certifica a pranta ornamental producida pola Asociación de Viveiristas do Noroeste
01/03/2019.

Galicia Calidade certifica a pranta ornamental producida pola Asociación de Viveiristas do Noroeste

A Consellería de Economía, Emprego e Industria, a través de Galicia Calidade, fixo entrega hoxe do certificado de calidade á Asociación de Viveiristas do Noroeste (Asvinor) para o seu uso na distinción da pranta ornamental de Galicia. A directora xeral de Comercio, Sol Vázquez, e o xerente de Galicia Calidade, Alfonso Cabaleiro, foron os encargados de entregar o distintivo a nove viveiros galegos durante a celebración da feira Arco Verde, no recinto feiral de Amio e que este ano cumpre o seu décimo aniversario. 

Para a certificación destes viveiros Galicia Calidade impulsou xunto con Asvinor, a Fundación Juana de Vega e Agaexar (Asociación de Empresas de Xardinería) da norma de calidade “Pranta Ornamental de Galicia”, unha iniciativa pioneira en España e que permitirá diferenciar un produto dunha calidade tan contrastada e recoñecida nos mercados nacionais e internacionais, a pranta ornamental galega. 

Esta norma pretende homoxeneizar a pranta producida en distintos viveiros da comunidade, establecendo un catálogo de producións, incluíndo as producións nas bases de construción e arquitectura da paisaxe e establecendo o distintivo “Planta de Galicia”, que irá acompañado da marca Galicia Calidade

Entre os viveiros que poderán lucir o distintivo atópanse cinco na provincia da Coruña: Anselmo Langueiro Merino de Viveiros Lamigueiro (Carral), Hortival Narón, Viveros Leboreo (Carballo), Estela Orvi (Teo) e Xardín Senra (Santiago de Compostela). Dous viveiros atópanse na provincia de Lugo: Viveros Cabaleiros (Lourenzá) e Viveros Costa de Lóngaras (Abadín), e outros dous en Pontevedra: Viveros San Campio (Tomiño) e Estelas da Terra (A Estrada). 

Segundo indicou a propia directora xeral, esta entrega pecha o traballo realizado entre a Consellería e o sector dos últimos dous anos para tratar de establecer os requisitos necesarios para a certificación dun produto dunha calidade recoñecida e valorada polos consumidores. A creación da norma “Pranta Ornamental de Galicia” supón un avance na modernización e internacionalización deste sector.
 

Redes sociais

Multimedia