Inicio / NOVAS / Notas de prensa / INNOVACIÓN E INDUSTRIA DESTINA 100.000 EUROS NA POSTA EN MARCHA DUN NOVO ESTABLECEMENTO DA REDE DE COMERCIO RURAL GALEGO
23/01/2009.

INNOVACIÓN E INDUSTRIA DESTINA 100.000 EUROS NA POSTA EN MARCHA DUN NOVO ESTABLECEMENTO DA REDE DE COMERCIO RURAL GALEGO

A provincia da Coruña conta a día de hoxe cun total de sete establecementos adheridos

A directora xeral de Comercio, Ana Rúa, visitou esta mañá un novo establecemento adherido á Rede de Comercio Rural Galego, Casa Suárez, situado no concello coruñés de Santiso, na parroquia de Arcediago. No acto de inauguración tamén estivo presente o xerente de Galicia Calidade, Ignacio Louzao. A comezos do 2008, púxose en marcha o establecemento piloto no concello de Touro, Casa Varela; e recentemente, Casa Carril, en Teo; O Mesón de Visantoña, en Mesía; o Mesón Pontecarreira, en Frades; Casa Senra, en Mazaricos; e Casa Landeira, en Vimianzo. Con este inaugurado hoxe son xa sete os establecementos postos en marcha na provincia da Coruña e un total de 15 repartidos por todo Galiza.

Casa Suárez contou cunha aportación do departamento autonómico de 100.000 euros para a súa rehabilitación e adaptación aos criterios da Rede de Comercio Rural Galego. A inversión total para a remodelación foi de 155.000 euros. A actuación realizada foi a adecuación do anterior establecemento, dotándolle dunha armonía arquitectónica e apostando polos materiais de calidade, tanto no seu interior coma no aspecto exterior. Fixose un aumento considerable do seu espazo público, tanto no referente á tenda como no espazo de bar. Trátase dun establecemento multiservizo, moi recoñecido no concello de Santiso.

Habilitouse unha área de almacén, unha área para autoservicio e unha zona de bar. Dispuxéronse aseos adaptados para a accesibilidade de persoas con discapacidade e, por outro lado, dotouse ao establecemento dun Terminal de Punto de Venta (TPV) e ferramentas de xestión empresarial modernas, que xunto coa formación que recibiron os comerciantes axudan a consolidar a viabilidade deste proxecto.

Casa Suárez, que así se chama este establecemento, conta con máis de 50 anos de historia e é o único establecemento deste tipo na súa zona polo que a súa rehabilitación cubre tamén as necesidades da poboación máis próxima ao mesmo. Este establecemento reabre agora as súas portas para dar servizo a un concello rural como o de Santiso e facilitar así as condicións de vida ás súas veciñas e veciños, ofertando todos aqueles produtos de primeira necesidade, produtos ecolóxicos, de Artesanía de Galicia así como facilitando o acceso ás novas tecnoloxías.


1,5 millóns de euros
O departamento autonómico investiu na Rede de Comercio Rural Galego un millón e medio de euros ao longo do ano 2008 . Co desenvolvemento da rede a Consellaría quere levar a calidade de vida e dotar de servizos a todas as zonas do noso rural, cumprindo así varios obxectivos, como son: adecuar a oferta comercial ás necesidades da poboación, mellorar a rendibilidade da xestión dos establecementos, crear postos de traballo e dinamizar a economía rural, dotar de novos produtos e servizos ao comercio rural aumentando a súa calidade e comercializar produtos autóctonos e artesanais galegos.

A rede, que contaba até o día de hoxe con catro establecementos piloto repartidos por todo o país, máis os recentemente inaugurados na Pobra do Brollón, A Pastoriza, As Nogais, Teo, Mesía, Pontecareira, Mazaricos,Vimianzo, Barro e Pontevedra, suma xa a día de hoxe catorce proxectos en funcionamento adheridos á Rede de Comercio Rural Galego.

A Rede, promovida pola Dirección Xeral de Comercio da Consellaría de Innovación e Industria, conta cunha rede de tendas repartidas por toda Galiza e que dispoñen dun servizo de asesoramento de xestión integral –a través de Galicia Calidade–, unha promoción conxunta das mesmas e formación para os seus propietarios e traballadores. O selo de Comercio Rural Galego garante pois a calidade e o cumprimento da normativa dos mesmos e unha garantía de confianza dos servizos ofertados.

A marca Comercio Rural Galego conleva a oferta dunha serie de produtos mínimos comúns a todos os establecementos da rede, entre os que destacan os produtos locais, ecolóxicos e de artesanía alimentaria co fin de que o comercio rural sexa o referente de produtos frescos de calidade. Así, ademais de produtos frescos (hortalizas, verduras, froitas...) e transformados (mel, viño, lácteos, licores), comercialízanse denominacións de orixe galegas, produtos ecolóxicos co selo de Agricultura Ecolóxica de Galiza, produtos da marca Galicia Calidade e Artesanía de Galicia. Canto aos servizos, existen uns mínimos como os de café-bar, un punto de información turística, un punto de acceso a internet e a posibilidade do pagamento con tarxeta.

Nos vindeiros días un total de tres tendas máis serán postas en marcha repartidas por todo o país. Deste xeito, a Rede de Comercio Rural Galego contará a finais deste mes cun total de 18 establecementos adheridos, dotando así a milleiros de galegas e galegos de máis e mellores servizos no rural galego.

19/01/2009.

INNOVACIÓN E INDUSTRIA DESTINA 100.000 EUROS NA POSTA EN MARCHA DUN NOVO ESTABLECEMENTO DA REDE DE COMERCIO RURAL GALEGO

A directora xeral de Comercio, Ana Rúa, visitou hoxe O Mesón Pontecarreira, o último establecemento incorporado, no concello coruñés de Frades

A directora xeral de Comercio, Ana Rúa, visitou esta mañá un novo establecemento adherido á Rede de Comercio Rural Galego, O Mesón Pontecarreira, situado no concello de Frades, na parroquia de Pontecarreira. No acto de inauguración tamén estivo presente o xerente de Galicia Calidade, Ignacio Louzao. Coa inauguración do Mesón Pontecarreira a Rede de Comercio Rural Galego conta a día de hoxe con catro establecementos na provincia da Coruña. A comezos do 2008, púxose en marcha o establecemento piloto no concello de Touro, Casa Varela, e recentemente, Casa Carril, en Teo, e O Mesón de Visantoña, en Mesía.

O Mesón Pontecarreira contou cunha aportación do departamento autonómico de 100.000 euros para a súa rehabilitación e adaptación aos manuais da Rede de Comercio Rural Galego. A inversión total para a remodelación foi de 156.000 euros. A actuación realizada foi a adecuación do anterior establecemento, respectando a súa tradición e valor arquitectónico e mesturando coa modernidade e as novas tecnoloxías. Trátase dun establecemento cunha gran tradición no concello e que coa actual, son cinco xeracións da mesma familia á fronte do mesmo e cunha antigüidade de máis de 130 anos.

Habilitouse unha área de almacén, unha área para autoservicio, tanto de alimentación coma utensilios para a práctica de deportes como a pesca e caza, ferretería e unha zona de bar. Dispuxéronse aseos adaptados para a accesibilidade de persoas con discapacidade e, por outro lado, dotouse ao establecemento dun Terminal de Punto de Venta (TPV) e ferramentas de xestión empresarial modernas, que xunto coa formación que recibiron os comerciantes axudan a consolidar a viabilidade deste proxecto.

O Mesón Pontecarreira, que así se chama este establecemento, abre agora as súas portas para dar servizo a unha parroquia rural como a de Pontecarreira e facilitar así as condicións de vida ás súas veciñas e veciños, ofertando todos aqueles produtos de primeira necesidade, produtos ecolóxicos, de Artesanía de Galicia así como facilitando o acceso ás novas tecnoloxías.

18 establecementos en funcionamento
O departamento autonómico investiu na Rede de Comercio Rural Galego un millón e medio de euros ao longo do ano 2008 . Co desenvolvemento da rede a Consellaría quere levar a calidade de vida e dotar de servizos a todas as zonas do noso rural, cumprindo así varios obxectivos, como son: adecuar a oferta comercial ás necesidades da poboación, mellorar a rendibilidade da xestión dos establecementos, crear postos de traballo e dinamizar a economía rural, dotar de novos produtos e servizos ao comercio rural aumentando a súa calidade e comercializar produtos autóctonos e artesanais galegos.

A rede, que contaba até o día de hoxe con catro establecementos piloto repartidos por todo o país, máis os recentemente inaugurados na Pobra do Brollón, A Pastoriza, As Nogais, Teo, Mesía, Barro e Pontevedra, suma xa a día de hoxe doce proxectos en funcionamento adheridos á Rede de Comercio Rural Galego.

A Rede, promovida pola Dirección Xeral de Comercio da Consellaría de Innovación e Industria, contará cunha rede de tendas repartidas por toda Galiza e que disporán dun servizo de asesoramento de xestión integral –a través de Galicia Calidade–, unha promoción conxunta das mesmas e formación para os seus propietarios e traballadores. O selo de Comercio Rural Galego garante pois a calidade e o cumprimento da normativa dos mesmos e unha garantía de confianza dos produtos ofertados.

A marca Comercio Rural Galego conleva a oferta dunha serie de produtos mínimos comúns a todos os establecementos da rede, entre os que destacan os produtos locais, ecolóxicos e de artesanía alimentaria co fin de que o comercio rural sexa o referente de produtos frescos de calidade. Así, ademais de produtos frescos (hortalizas, verduras, froitas...) e transformados (mel, viño, lácteos, licores), comercialízanse denominacións de orixe galegas, produtos ecolóxicos co selo de Agricultura Ecolóxica de Galiza, produtos da marca Galicia Calidade e Artesanía de Galicia. Canto aos servizos, existen uns mínimos como os de café-bar, un punto de información turística, un punto de acceso a internet e a posibilidade do pagamento con tarxeta.

Nos vindeiros días un total de seis tendas máis serán postas en marcha repartidas por todo o país. Deste xeito, a Rede de Comercio Rural Galego contará a finais deste mes cun total de 18 establecementos adheridos, dotando así a milleiros de galegas e galegos de máis e mellores servizos no rural galego.

Redes sociais

Multimedia